भावांतर योजनेअंतर्गत खरीप 2026 साठी नोंदणी; ग्रामपंचायतीपासून सहकारी संस्थांपर्यंत सुविधा केंद्रांची व्यवस्था
इंदौर, 30 सप्टेंबर 2026 : खरीप हंगामातील सोयाबीन उत्पादक शेतकऱ्यांसाठी महत्त्वाची सूचना समोर आली आहे. भारत सरकारच्या प्राइस डिफिसिट पेमेंट स्कीम अर्थात भावांतर योजनेअंतर्गत खरीप वर्ष 2026 (विपणन वर्ष 2026-27) मधील सोयाबीन पिकासाठी शेतकऱ्यांची ई-उपार्जन पोर्टलवर नोंदणी 3 ते 17 ऑक्टोबर 2026 या कालावधीत करण्यात येणार आहे.
शेतकऱ्यांना ई-उपार्जन पोर्टलवर निर्धारित प्रक्रियेनुसार नोंदणी करता येणार असून, जिल्ह्यात विविध ठिकाणी नोंदणी केंद्रांवर आवश्यक सुविधा उपलब्ध करून देण्यात आल्या आहेत.
मोफत नोंदणीची सुविधा
शेतकऱ्यांना कोणताही अतिरिक्त खर्च न करता नोंदणी करता यावी, यासाठी ग्रामपंचायत, जनपद पंचायत आणि तहसील कार्यालयांमध्ये सुविधा केंद्रे सुरू करण्यात आली आहेत. याशिवाय सहकारी संस्था आणि सहकारी विपणन संस्थांमार्फत चालविण्यात येणाऱ्या नोंदणी केंद्रांवरही नोंदणीची सुविधा मोफत उपलब्ध असेल.
सशुल्क केंद्रांवर कमाल 50 रुपये शुल्क
एमपी ऑनलाइन किऑस्क, कॉमन सर्व्हिस सेंटर, लोकसेवा केंद्र तसेच खासगी सायबर कॅफेमधूनही शेतकरी नोंदणी करू शकतील. या केंद्रांवर एका नोंदणीसाठी कमाल 50 रुपये शुल्क आकारता येईल.
नोंदणी करताना जमिनीशी संबंधित कागदपत्रे, आधार कार्ड आणि इतर फोटो ओळखपत्रांची योग्य पडताळणी करून त्याची नोंद ठेवणे संबंधित केंद्रांसाठी बंधनकारक राहणार आहे.
सिकमी, बटाईदार आणि वनपट्टाधारकांसाठी स्वतंत्र व्यवस्था
सिकमी, बटाईदार, कोटवार आणि वनपट्टाधारक शेतकऱ्यांना नोंदणीची सुविधा केवळ सहकारी संस्था किंवा सहकारी विपणन संस्थांच्या नोंदणी केंद्रांवर उपलब्ध करून देण्यात येणार आहे. या वर्गातील सर्व शेतकऱ्यांची महसूल विभागामार्फत पडताळणी केली जाणार आहे.
आधार लिंक बँक खात्यात मिळणार विक्रीचे पैसे
शेतकऱ्यांनी विक्री केलेल्या सोयाबीनचे पैसे प्राधान्याने त्यांच्या आधारशी जोडलेल्या बँक खात्यात जमा केले जातील. काही कारणास्तव या खात्यात पैसे जमा करण्यात अडचण आल्यास नोंदणीच्या वेळी उपलब्ध करून दिलेल्या बँक खात्यात रक्कम जमा करण्याची व्यवस्था असेल.
नोंदणी करताना शेतकऱ्यांना बँक खाते क्रमांक आणि IFSC कोड द्यावा लागणार आहे. निष्क्रिय खाते, संयुक्त खाते तसेच Fino, Airtel आणि Paytm प्रकारची खाती नोंदणीसाठी ग्राह्य धरली जाणार नाहीत.
शेतकऱ्यांनी आधार क्रमांकाशी बँक खाते आणि मोबाईल क्रमांक लिंक करून ते अद्ययावत ठेवण्याचे आवाहन करण्यात आले आहे.
आधार पडताळणी अनिवार्य
सोयाबीनची नोंदणी तसेच पिकाची विक्री करण्यासाठी आधार क्रमांकाची पडताळणी आवश्यक राहणार आहे. ही पडताळणी आधारशी जोडलेल्या मोबाईल क्रमांकावर येणाऱ्या OTP द्वारे किंवा बायोमेट्रिक उपकरणाच्या माध्यमातून करता येईल.
भू-अभिलेखातील खाते व खसऱ्यावर नोंद असलेले शेतकऱ्याचे नाव आणि आधार कार्डवरील नाव यामध्ये ताळमेळ असणे आवश्यक आहे. नावामध्ये विसंगती आढळल्यास तहसील कार्यालयामार्फत पडताळणी करण्यात येईल. पडताळणी पूर्ण झाल्यानंतरच नोंदणी वैध मानली जाईल.
जुन्या नोंदणीकृत शेतकऱ्यांना एसएमएसद्वारे सूचना
मागील खरीप हंगामातील नोंदणीदरम्यान उपलब्ध असलेल्या मोबाईल क्रमांकांवर शेतकऱ्यांना एसएमएसद्वारे नोंदणीची माहिती पाठविण्यात येणार आहे.
याशिवाय ग्रामपंचायतींच्या सूचना फलकांवर माहिती प्रसिद्ध करणे, गावांमध्ये दवंडी देणे तसेच सहकारी संस्था आणि मंडई स्तरावर बॅनर लावून शेतकऱ्यांना नोंदणीच्या कालावधीची माहिती देण्याच्या सूचना देण्यात आल्या आहेत.
शेतकऱ्यांनी 3 ते 17 ऑक्टोबरदरम्यान आपली सोयाबीन नोंदणी पूर्ण करून आवश्यक कागदपत्रे आणि आधार-बँक तपशील अद्ययावत ठेवावेत, असे आवाहन करण्यात आले आहे.
(SDNA)